2017 - 05 - 27

DBH


Astelehena, maiatzaren 22a

ANDRE MARIA LAGUNTZAILEAK LAGUN EGITEN DIGU

BIBLIAKO IRAKURGAIA: Apostoluen eginak 1, 14

«Guztiok, emakume batzuekin eta Jesusen ama Maria eta anai-arrebekin, bihotz batez otoitzari emanak bizi ziren»

IRAKURGAIA: Mariak beti egiten dit lagun (Santa Teresa Kalkutakoa)

«Andre Mariak –esan zidan- bidaia guztietan egiten dit lagun; “nire Bidelaguna” esaten diot, egun batean, Berhanpur-en, ahizpen kapilauari Andre Maria Mirarietakoaren irudi bat, esku zabalik munduari graziak isuriz, oparitzeko eskatu nionetik. Pozik onartu eta irudia paketatu eta geltokira eraman zuen. Oso irudi handia zen, ia tamaina naturalekoa, hortaz, geltokiburuak fakturatu eta zegokion tarifa ordaintzea nahi zuen. Baina nik, niretzat eta beste lagun batentzat, trenbideetako baimena nuenez, zera esan nion: “Hau laguna dut…” eta, gehiago ordaindu barik, irudiarekin igarotzen utzi zidan. Harrezkero, Maria beti dut lagun. Inoiz ez naiz bakarrik bidaiatzen».

BIDEOA: Ama-maitasuna: https://www.youtube.com/watch?v=N7Nyp3F70n4

OTOITZA: AGUR MARIA // Andre Maria, Kristauen Laguntzailea, egin otoitz gure alde.

Asteartea, maiatzaren 23a

ANDRE MARIA LAGUNTZAILEA

GURE FESTA

BIBLIAKO IRAKURGAIA: Apokalipsia 12, 1

«Seinale handi bat agertu zen zeruan: emakume bat, eguzkiz jantzia, ilargia oinazpian eta hamabi izarreko koroa buruan»

IRAKURGAIA: (Inspektorearen edo zuzendariaren zorion-mezua irakur daiteke)

Lorenzoneren irudiari begira, Agur Maria errezatuko dugu.

Errezatu baino lehen, irudia proiektatu eta, hala dagoela, deskribatu.


Asteazkena, maiatzaren 24a

GORA ANDRE MARIA LAGUNTZAILEA!

(Egun hau berezia da ikastetxe guztietan; festa ikasgelatik kanpo ospatzen dugu).

Osteguna, maiatzaren 25a

MARIA, EMAKUME LANGILEA


EBANJELIOA: Mateo 12, 50

«Izan ere, zeruko nire Aitaren nahia egiten duena, horixe dut nik anaia, arreba eta ama».

IRAKURGAIA

XX. mendeko 60ko hamarkadaren hasieran, Walter Keane Estatu Batuetako artistarik famatuenetako bat zen, pintatzen zituen erretratuei esker: umeak, emakumeak eta animaliak, tristeziaz beteriko begi handiz. Beronen estiloa ez zen arte-kritikari gehienen gustukoa, kitschegia zelakoan, baina garai hartan oso ezaguna egin zen eta, horregatik, imitatzaile asko zituen. Artistak dirutza handia egin zuen.

Margolariak eta emazteak (Kalifornian bizi ziren) Hollywoodeko izar handiak zituzten lagun: Natalie Wood, Joan Crawford, Jerry Lewis edo Kim Novak. Batzuek erretratatzeko eskatu zioten.

Andy Warholek ere goratu zuen Keaneren lana. Esaten zuen hain arrakasta handia bazuen, kritikariek esan bezain txarra ez zitekeela izan.

Baina Keaneren gorabidean, masentzako artearen gailurrera bidean, arazo bat zegoen, handik urte batzuetara jakingo zena: pinturak sortzen zituena ez zen bera, Margaret, emaztea, baizik. Senarrak, ia hamar urtean, etxeko estudioan sartuta eduki zuen, etengabe koadroak pintatzen.

Tim Burton zinegileak Big Eyes (Begi handiak) filma egin zuen, senar-emazte hauen historian oinarritua. Protagonistak: Amy Adams eta Christoph Waltz.

Historia, oro har, euren lanean edo zereginean (artean, zientzietan, familian,…) aintzat hartu ez dituzten emakumez betea dago, balio izugarriko emakumez betea.

Bukatzear dagoen maiatz honetan, Andre Mariaren hilean, mundu hobea egiten lagundu duten emakume askoren lana aintzat hartu, erakutsi eta eskertu nahi dugu.

BIDEOA: Vaiana: ¿Qué hay más allá?: https://www.youtube.com/watch?v=ftNOCfqoIjQ

OTOITZA

Utz iezazkidazu, Ama, … zure ezpainak,
horiekin errezatzeko.

Eurekin errezatzen badut, Jesusek baitit entzungo.

Utz iezazkidazu, Ama, zure besoak, lan egin ahal izateko,
hala lanari etekin handiagoa baitiot aterako.

Utzidazu, Ama, zure mantua, nire gaiztakeria estaltzeko,
zure mantuaz estalia Zerura bainaiz iritsiko.
Utzidazu, Ama, zure Semea, nik maitatu ahal izateko,
Zuk Jesus ematen badidazu, zer izango dut berau baino nahiago?

Eta horixe izango da nire poza beti-betiko.


Ostirala, maiatzaren 26a

MAIATZA, ANDRE MARIAREN HILA

EBANJELIOA: Mateo 13, 55

«Ez al da, bada, arotzaren semea? Honen amak ez ote du izena Maria?»

IRAKURGAIA

Don Bosco eta Maria Laguntzailearen izena bata bestearentzat eginak zeuden, baina luzarotxoan egon ziren batu gabe. Historia 1824ko gau batean hasi zen. Piemonteko baserri-etxe batean, Turinetik 50 bat kilometrora, 9 urteko mutiko batek amets egiten zuen, eta gauza handiak ikusten zituen ametsean: Mutiko abandonatuek inguratua zegoen. Mutikoak elkarrekin borrokan ari ziren. Andre misteriotsu batek bizitza mutiko horiei laguntzen eman behar zuela eta berak lagunduko ziola esan zion.


Handik urte batzuetara, Joan Bosco izeneko mutiko hura, gizonduta, apaiz egin zen.  Aspaldiko amets hark markatua bizi zen. Turingo kaleetatik ibiltzen zen eta mutiko abandonatu eta galdu asko ikusten zituen. Hamaikatxok kartzelarako bidea hartua zuten. Don Bosco haien adiskide egin zen, zaindu egin zituen, etxean hartu,… Denez arduratu zen.
Don Boscok ahal zuen guztian laguntzen zuen. Ordurako bazekien ametseko andre hura nor zen: Ama Birjina. Lehenengotan ez zuen Andre Maria Laguntzailea esaten. Nahiago zuen Ama Birjina Kontsolatakoa esan, Turingo zaindaria baitzen. Azkenik, bere Ama Birjinaren izena zein zen erabaki zuen; Laguntzailea izango zen, bere mutil gazteek laguntza handia behar zutelako, baita zerukoa ere. 1856an, Don Boscoren ama, Ama Margarita, hil zenean, berak hitz hauek esan zizkion Andre Maria Laguntzaileari: “Nik eta nire gazteek ez dugu amarik mundu honetan, izan nahi duzu zuk gure ama?”
Eta, itxuraz, Ama Birjinak eskaerari baiezkoa eman zion. Handik 30 urtera, indarrik gabeko aguretxoa zenean, Don Bosco Andre Maria Laguntzailearen Santutegian Eukaristia baten buru izan zen, Ama Birjinaren irudi nagusiaren aurrean. Zenbait aldiz eman zion negarrari. Ondokoek zera entzun zioten: “Berak egin du dena, berak egin du dena”. Ordutik hona, Andre Maria Laguntzailearen izena eta Don Boscoren izena beti joan dira bata bestearen ondoan. Horregatik ospatzen dugu urtero bien festa.

BIDEOA/OTOITZA: … Pavarotti and Bono: https://www.youtube.com/watch?v=1nizM7a9wlI